Ey Xaliqi - Sübhan, sənə ərzimdə nida var!
İman eliyəndən bəri tək həmd - səna var.
Hər zülmə sınaqdır adı verdim ki, dəva var.
Gəl əksini gördüm, nə qədər cövrü-cəfa var.
Bir duyğudu, ilham eliyər səndə səfa var.
Əqlim mənə söylər yenə qəsdündə bəla var.

Bir yoxsulun haqqın qazanar varlı müsəlman.
Tə’yin olunan miqdarı etsin ona ehsan.
Haqqın qədərin, miqdarı bilməz ki, bu insan!
Haq bir yana, nə ayəni bilməz, nə də Qur’an.
Agahsıza neyçün edəsən haqqımı qurban?
Allah belə olsan yenə hökmündə xəta var!
Ey Xaliqi - Sübhan sənə ərzimdə nida var!

Allah, yoluna ömrünü etmişsə nəzir qul.
Hər dərdi üçün çarəni rahında gəzir qul.
Hasilsiz olan hacət ilə qəlbin əzir qul.
Səbrin nə qədər sıxsada əlbətdə bezir qul.
Şahənşaha səhvsən deyə bilməz ki, vəzir, qul.
Mən söyləyərəm haqqımı bilsəmdə cüda var.
Ey Xaliqi - Sübhan sənə ərzimdə nida var!

Bir ayəni qeyd eyliyəcəm mövzuya qüvvət.
Həzm etmə riba söyləyir səndən enən ayət.
Qat - qat malı artırma deyil burdakı hikmət?!
Həmçin savaş e’lanını etməkdi bu zillət.
Hərçənd otuz ildir savaş açmış sənə dövlət.
Səndən nə səda var, nə bəla var, nə cəza var!
Ey Xaliqi - Sübhan sənə ərzimdə nida var!

Dövrün acı bir təsiri qəlbimdədi əlbət
Çox şeydə səbəb var eliyim Rəbbə şikayət.
Umrumda deyil fəhm eliyir, eyləmir ümmət.
Hərgah eləsə nurlanacaq qapqara zülmət.
Əşarıma düşmüşsə əgər nöqtə qəbahət,
Göndər bu əziz canə bəla ver ki riya var.
Ey Xaliqi - Sübhan sənə ərzimdə nida var!

Müəllif: Anar Əhəd