Sanma sağlaram

Ərş uzaqdı, əlim çatmaz,
Buludlara dişim batmaz,
Sərsəm qəlbim oyaq, yatmaz,
Oturub zar – zar ağlaram.

Vaxt da keçir aram – aram,
Bu gün varam, sabah yoxam,
Divardan asılar soxam,
Bax onda solmuş bağlaram.

Qələm dolu darağ ola,
Yara vuran yarağ ola,
Bir də bir ağ varağ ola,
Onda dağları dağlaram.

Dönə - dönə döyün ürək,
Döyünməyin mənə gərək,
Sən də bərk əs, kəs ey külək,
Çaylarda sel tək çağlaram.

Ov insafsız, ovçu xəstə,
Durnalar da dəstə - dəstə,
Qaqqıldaşar zildə, pəsdə,
Dəstəyə dastan bağlaram.

Gözüm qalar gözəllərdə,
Naz eyləyər gözəllər də,
Qəmzələri qəzəllərdə,
Mənsə təklikdən zağlaram.

Bir mesaj yaz oxuyum mən,
Misra – misra qoxuyum mən,
Sözdən çələng toxuyum mən,
Boşalmış bostan, tağlaram.

Ahu, tutar səni haım,
Dolar, boşalar mey camım,
Cəfa çəkən cismim, canım,
Səngərli, sanma sağlaram.
~~~~~~~~~~~~~~~~~~~~
01.04.2012-ci il