Dərdim olmaz

Dərviş olam, eldə gəzəm,
Mizrab olam, teldə gəzəm,
Nəğmə olam, dildə gəzəm,
Heç dünyada dərdim olmaz.

Zirvə olam, zildə gəzəm,
Lilpar olam, lildə gəzəm,
Firon olam, fildə gəzəm,
Heç dünyada dərdim olmaz.

Şana olam, teldə gəzəm,
Buta olam, tüldə gəzəm,
Bülbül olam, güldə gəzəm,
Heç dünyada dərdim olmaz.

Yarağ olam, beldə gəzəm,
Yelkən olam, yeldə gəzəm,
Sel – su olam, seldə gəzəm,
Heç dünyada dərdim olmaz.

Şeyda1 olam, şöydə gəzəm,
Damcı olam, göldə gəzəm,
Çör-çöp olam, çöldə gəzəm,
Heç dünyada dərdim olmaz.

Şeşə2 olam, şehdə gəzəm,
Meşə olam, mehdə gəzəm,
Şüşə olam, zehdə gəzəm,
Heç dünyada dərdim olmaz.

Ələy olam, öydə gəzəm,
Mələy olam, köydə3 gəzəm,
Fələy olam, göydə gəzəm,
Ay Hüseyin, dərdim olmaz.
~~~~~~~~~~~~~~~~~~~~
1. Şeyda – dəli, divanə (məhəbbətdə),
2. Şeşə - məğrur, qürurlu,
3. Köydə - kənddə mənalarında.

22.07.2012-ci il