Yenə qarşımdasan, gözün gözümdə,
Ruhun canımdadır, özün özümdə,
Adın dilimdədir, sözün sözümdə,
Sən daim, solmayan bir bağsan, ana!
Hələ də gözümdə sən sağsan, ana!

Öyüdün yenə də qulağımdadır,
Mehriban öpüşün yanağımdadır,
Ruzun, bərəkətin ayağımdadır,
Əlimdə tutduğum bayraqsan, ana!
Hələ də gözümdə sən sağsan, ana!

O gözəl məqamlar, çağlar de hanı?
Könül unudarmı xoşbəxt bir anı?
Qulağım eşidir şirin laylanı,
Qaynayan çəşməsən, bulaqsan, ana!
Hələ də gözümdə sən sağsan, ana!

Ömrünü namusla vurdun sən başa,
Bir arzun,istəyin dəymədi daşa.
Surətin qəlbimi gətirir cuşa,
Vüqarlı zirvəsən, sən dağsan, ana!
Hələ də gözümdə sən sağsan, ana!

Həyatın bir örnək olubdu mənə,
Nə qədər yaşasam borcluyam sənə.
Demişəm, deyirəm, deyəcəm yenə:
Ləkəsiz, təmizsən, dümağsan, ana!
Hələ də gözümdə sən sağsan, ana!