Bu şeiri Xalidə Nüsrətin "Gəl,bahar." şeirini oxuduqdan sonra yazdım...


“Gəl gülüm”

Gəl, gülüm, hicrana qalmadı dözüm,
Dikilib yollara intizar gözüm.
Sənin pişvazına hazıram özüm,
Qəlbim koma deyil, kaşanədir gəl !
Könlüm həsrətinlə divanədir, gəl !

Sən gəlsən qəlbimdən qəm-kədər qaçar,
Məhəbbət bağçamız gül ətri saçar.
Təbiət bizimçün qolların açar,
Hər bucaq mənimçün meyxanədir gəl !
Könlüm həsrətinlə divanədir, gəl !

Sanıram çağıran dilindir sənin,
Meh əsir üzümdə telindir sənin.
Nəyisə qucuram belindir sənin,
Çiçəklər gözümdə peymanədir, gəl !
Könlüm həsrətinlə divanədir, gəl !

Gəlişin gözəldir, bahara bənzər,
O qədd-qamətin çinara bənzər,
Pərişan zülflərin şahmara bənzər.
Dişlərin incidir, dürdanədir, gəl !
Könlüm həsrətinlə divanədir, gəl !

Gəl, gülsün bənizim, naləm qalmasın,
Yetişək vüsala, bir kam qalmasın.
Sevgidə bir kəs də nakam qalmasın,
Dünya başdan-başa əfsanədir gəl !
Könlüm həsrətinlə divanədir, gəl !

İnan ki,bədəndə ruhum, canımsan,
Ürəyim, beyinim, zehnim, qanımsan.
Gəl dərdə çarə qıl, son gümanımsan,
Fədakar sözündə mərdanədir, gəl !
Könlüm həsrətinlə divanədir, gəl !