9.3.2019 14:34:57
Qara torpaq, yalvarıram,
Anam səndə əmanətdi.
Qucağını isti saxla,
Anam səndə əmanətdi.
Sən hamının anasısan,
Dərdimizi qanasısan.
Odumuza yanasısan,
Anam səndə əmanətdi.
Bu dünyanın qaydasıdı,
Yaradanın sevdasıdı.
Dilimizin faydasıdı,
Anam səndə əmanətdi.
Sağam, qədrin biləcəyəm,
Dünya fani, öləcəyəm.
Bir gün mən də gələcəyəm,
Anam səndə əmanətdi.
Əflatunam, budur sözüm,
Torpaq, sənə qurban özüm.
Qalmayıbdır tabım, dözüm,
Anam səndə əmanətdi.
17.02.2019.
