Kasîde-i Elifnâme



Bir bakıp evvel hurûfa hikmet-i Rahmânı gör
Ki elif birdir makâm-ı cevdet-i Gufrânı gör

Bâ girip cism-i cemâdîye kim oldu rûh u cân
Noktasında gizlemiş ol râz-ı nûr-efşânı gör

Tevbe ile ten ü cânı pâk idip der-gâhda
Zâhir-i tâ seyyidân-ı pâk olan sıbyânı gör

Sâ’da gördüm ol sevâbı üç nukat içre biri
Zâtı vü evsâfı birle kudret-i Sübhânı gör

Cîm ile ol cümle mevcûdât-ı Hâlik cem’ olup
Hakk cemâlinden zuhûr iden der-i sultânı gör

Etti hâ ile nişân elbet cemâl birle kemâl
Bir gün erer kim zevâle ondaki ferzânı gör

Nokta-i dâdı başına tâc-ı hayret etti hâ
Ol hakîkatli haberde müjde-i cânânı gör

Âbid-i dâl mâsivâdan vaz geçip yârân gibi
Her demi nâlân ile giryân olan pîrânı gör

Zâkir-i zâl ki hakîkat sırrını zikr eyledi
Ehl-i hâlle dâimâ ol sâlik-i zikrânı gör

Râ gibi ol rahmet-i Rahmânı kesb etmek için
Meclis-i yâr karşısında âşık-ı hırrânı gör

Sırr-ı zâ peydâ olur bir gün hakîkatdir bu bil
Şimdiden sonra zevâl-i zîver-i bûstânı gör

Râz-ı Rahmânı görüp sîn hâce-i iflâh ile
Kapısında şu sevinen âbid-i hayrânı gör

Dembedem şîn şâkir ü zâkir olup şevke gelir
Nitekim hayretle gerden-bende-i şükrânı gör

Eyledi sıdk u sebât her-dem yolunda misl-i sâd
Gâfil olma gönlünü aşka açan ferhânı gör

Ol ziyâ-yı sabr ile zâd râh-ı aşkı nûr ider
Mübtelâ-yı derd olan uşşâk-ı ahen-cânı gör

Mûcib-i tâ ile her bir zâhirin bir bâtnı var
Tâ’at-ı vecdle ziyâ-yı merdüm-i çeşmânı gör

Feyz-i zâ bezm-i zaferde şem’-i ikbâl oldu hep
Ma’rifet ârzûsu ile pertev-i dermânı gör

İlm-i ’ayn hâsıl olur çeşm-i nigâh-ı giryede
Dürr-i meknûnu dökünce servet-i irfânı gör

Katre-i eşk-i gınâ ruhsâr-ı gayn’ın tâcıdır
Tercümân-ı dil olan ol dîde-i vicdânı gör

Fark idip bâtıl u hakkı bezm-i fâ’da şâd olur
Nice âşık misli sen de şu’le-i furkânı gör

Kâim oldu kâf ile ehl-i kanâ’at u bekâ
Ol makâma gel gönülden kurbet-i kurbânı gör

Kâf kerâmetle kifâyet ü karârı gösterip
Onu istîkânla bilmiş ehl-i dervîşânı gör

Nâsıh-ı lâm’a kulak verip vücudun yok idip
Şevk ile cândan geçip ol kişver-i fıkdânı gör

Lutf-ı mîm’den feyz ile aşk yoluna varmak için
Her zamân ihlâsla emr-i mürşid-i burhânı gör

Ol dedi kavlince nûn esbâb-ı tekvîn mazharı
Olan ilm-i nefs ile ilm-i şeh-i gerdânı gör

Ol şehâdet âleminden dûr olup vâv öğretir
Şol fenâdan geç visâl-i servet-i zî-şânı gör

Hâ ile hakkı bilip ârzû-yı vuslat besleyip
Ol hidâyet bâğçesinde penc-i şîr-merdânı gör

Hakk ile bir olmanın açtı yolunu lâm-elif
Vahdet-i mutlak ile ol vahdet-i Yezdânı gör

Ey Cevâî evveli hem âhiri bul yâ ile
Lezzet-i hikmet ile ol kâmil-i îmânı gör