BİR DEYİL...
1
ƏLİMİZİ İSTİ TUTMALI
Həmişə, həmişə
əlimizi isti tutmalı;
ayağımız yola isti dəyməli,
Hə, dəmiri isti-isti döyməli...
Haqqımız hardaysa, ora varmalı,
ocaqdan-ocağa od aparmalı.
bişirib deməli sözümüzü də,
hazırlamalı
ən sərt yoxuşlara dizimizi də...
Evdən çıxmalıyıq bir od parçası ,
hər səmtə bir od nəhri axmalıyıq,
bir göy guruldayıb,
ildırım çaxmalıyıq...
Kölgəmizi qaralayanları
buza döndərməli nəfəsimizlə.
bəlkə bir közümüz, bir sözümüzlə
onları buz kəsməli;
əlimizi isti tutmalıyıq, isti!..
2
İKİ GÖZÜNDƏN BİRİ...
Bax, ən çox sevdiyindi
iki gözündən biri;
adı dilində
iki sözündən biri...
inan, inamın olsun,
iki gözündən birinə
hər vaxt salamın olsun...
kürəyini söykəməyə uçulmaz divar,
gözünü səndən heç qaçırmaz
iki gözündən biri...
hər şeyə--
yerə, göyə diqqətlicə nəzər sal;
İki gözündən biri xoşbəxtliyin, xoş günün,
sanki ətri bürüyür səni bir gulun...
iki gözündən biri
həmişə yolunu aydınladacaq;
güvən daim iki gözündən birinə
və görəcəksən ki,
elə iki gozünmüş iki gözündən biri!
3
İRƏLİDƏ...
...Bax, hər şey irəlidə,
gözəl bir nəğmə, şeir irəlidə...
Bir qədəm atsan da, qələm çalsan da,
hədəf irəlidir geri qalsan da...
hər suala cavab var irəlidə,
şirinləşir acılar irəlidə...
arzu elədiyin ən gözəl həyat;
o, irəlidə,
ocaq irəlidə, od irəlidə...
böyük bir qələbəyə
aparan yoldur
bir “İrəli!”çağırışı bəlkə...
San ki, dayanıbdı bəxt irəlidə,
körpü irəlidə, bənd irəlidə.
Ümid sandığın da,
inandığın da
ancaq irəlidə, irəlidədir,
bilsən, yüz illərin geriliyi də
elə irəlidədir!..
4
TA QƏLBİMİN...
Ta qəlbimin çırpıntısı bir başqa,
Görüş, vida döyüntüsü deyil ha...
Seç günlərin yaxşısını, pisini;
Bu mənimdi, o sənindi-ayır ha...
Öndə çətin, bitməz bir yol uzanır,
Çox çəkməklə məgər ömür uzanır?
Dili gödək üstümə dil uzadır,
Bir budağı min tərəfə əyir ha...
Bu dağların qoy birinə ucalım,
Qalxım, enim, ən dərinə ucalım...
Bir ürəyin kədərinə ucalım;
Ən hündürdən bircə kəlmə deyim ha,
Yalın əlim buzda közə dəyir ha!..