Dizinə daş dəyər yoldan bilərsən,
Saçına dən düşər,ildən bilərsən,
Adın dilə düşər eldən bilərsən,
Eybini özündə gəz insan oğlu.

Haqqın tapdalanar,dilin tutular,
Mənasız şənliklə başın qatılar,
Göz aç ,oyan desəm qaşın çatılar,
Onda məzlum yaşa,döz insan oğlu!

Şiri nər olarsan söz arxasında,
Pərdələr asılır göz arxasında,
Neçə üz var hələ üz arxasında,
Dərdin çox,çarəsi az,insan oğlu!

Yalan şüar olub,tərifsə adət,
Içində qəfəsi qırıb cihad et,
Haqqını dilənib tapma səadət,
Hayqır ədaləti,yaz,insan oğlu!

Dilini kəssələr əlin susmasın,
Canını yaxsalar,külün susmasın,
inamın yolunda dizin əsməsin
Qılıncdan kəskindir söz,insan oğlu!

     Layla

Düşmən yallı gedir Şuşa elimdə,
Sən ey dillənməyən qeyrətim layla!
Vətən dərdi şələlənib belimdə,
İtən , batan hünər, qüvvətim layla!

İrəvan elinin adın itirdik,
Çörəklə duzunun dadın itirdik,
Qoca, cavan, uşaq, qadın itirdik,
Ey özümdə itən hörmətim , layla!

Şəhid qanı axar , sayın itirdik,
Yad səslərdə yurd harayın itirdik,
Allah ,necə haqqı -payın itirdik?
Susduqca azalan heyrətim, layla!

Qoynunda bəsləmiş əfi ilanı,
Qulağımız adət etmiş yalanı,
Qalx ey Türkün oğlu , durdur talanı,
Uyurkən bilinməz qiymətim layla!

Necə dözüm yağı verən yanığa?
Tənə ağır gələn  dərddir  qanığa,
Söylə Dilarətək qəlbisınığa,
Ölsün çin olmasa niyyətim , layla!

Dilarə Süleyman Çarıkçı