0
Yorum
0
Beğeni
0,0
Puan
1100
Okunma
Elnur Rəsuloğlu (Əliyev)
Kədərə qərq edib Azərbaycanı
Ağlatdı vəfatı Məmməd Arazın.
Nə qədər dünya var yaşayacaqdır,
Bitsə də, həyatı Məmməd Arazın.
Fırçatək yaratdı min rəng qələmi.
Mizrabtək yaratdı ahəng qələmi.
Həqiqət uğrunda tüfəng qələmi,
Söz oldu sursatı Məmməd Arazın.
İti qələmiylə söz kəsarəti
Qaldırdı ayağa xalqı, milləti.
Fəxri təltiflər yox, xalq məhəbbəti
Oldu mükafatı Məmməd Arazın.
Bütün aləm nura boyanıb durur,
Yatmış gözəl hislər oyanıb durur,
Gözlərim önündə dayanıb durur
Çəkiləndə adı Məmməd Arazın.
Qəlbinin bəhəri sözləri oldu.
Açılan səhəri sözləri oldu.
Ölməz əsərləri, sözləri oldu
Bizə amanatı Məmməd Arazın
